السروت تبورد في المحرك مراصة
سربة مقادة خيلها قليل تهرس القلة
و سربة بكثرة خيلها قرستها ناقصة
كون كان الذهب كثير
ما يكون زينة لعرايس
و من قلتو شعلت حروب
و مازال مكاحلها قارسة
قولو لبوشعيب
ما يبقاش فيك الحال
لا لكلام ما لقاتش وذنين تسمعو
الكلمة الغالية ذهب
و السرتلة العامرة عندها ناسها
و الجعلوق من رخصو لبساتو
الحمامة في سيقانها
و القبيلة عليها عاسة
ياك الكلام غا كلام
و علاش كلام كيف لبحر دايع
و كلام حاضياه جيوش مراصة
ما تغركش كثرة اللغا
و زواق الهضرة و اللحاسة
تنقية الزرع كتعزل الكحيلة
و الحبة المسوسة
و الحبة المكمولة تبقا مجبدة ناعسة
و عمر بوحبة ما تكون بحال القرطاسة
دور في مرح الكلام مزيان
و قرا وتمعن
و ما يغركش الميزان
شحال من خروفة عرجة
حسن من بزاف الخرفان
و قبل ما تقرا
قلب على المعدن
و عرف المركد و الجنان
حيث ثمرة الما المالح
ما تخلي بنا في اللسان
قولو لبوشعيب ما تبقاش تالف
حسب حسابك
و الكلمة وزنها في الميزان
و ملي يبان ليك ثقلها مزيان
غادي تفرز الذيب من الخرفان.