مجمع الفيران ما جاش من والو
جا ملي المش ما بقاش الصيد فبالو
ملي النسر نيش على خوك
و خلا الفار سارح في عشو و في جبالو
الفيران داعت في الكاعة
سارحة وسط الجماعة
و مقدم القبيلة مفرش ليها البساط
و يعلق ليها في كل ساعة
الطوبة دارت موزون تشطح
و الفيران دارو رباعة
البنادر تصريح
و السبيب بصيح
و البوق صوتو واصل للرباعة
للاه للاه يا خوتي
قولو لي مال القبيلة تبدل حالها
فين نسورها و فين رجالها
في لمتها و شوارها
مال القبيلة تلفت مالها
على حد عقولي
كان الشيخ يجلس مبندر
و الحكاك بالرزينة خاتر
و السبيب يصيح
لصباع الشيخ مسلم
و النغمة طالعة مريكلة
تجدب المجدوب
و الشعورات تشاير
و لي ما عندها شعر تسلفو
للاه للاه يا خوتي
راني وليت غريب
من القبيلة ما بقيت قريب
النغمة لي تجدبني ما لقيتها
الكلام باهت ما عندو معنى
بغيت نتحير ما لقيت علاش
بغيت نجدب النغمة ما مساوياش
كثرو الشيوخ و ما بقات تشياخت
و القبيلة ما بقا عندها وذنين و ضاخت
قولو لي فين مشاو الشياخ
و فين مشات النغمة المساوية
و فينما مشات الوذان الدواقة
و فين النقاد لي معاهم النغمة كانت ساوية
النغمة يا سيادي ماشي غنى
النغمة لي نهضر عليها كلام و معنى
كلمة في بوق و جملة في سوق
و شام و حنى
فين عمود الأخبار
و فين صحافة النوار
و المناشير الموزعة في الدوار
و فين الهوندا لي فضحت الغذار
فين جرائد الاحرار
ملي كان الاتحاد اتحاد
في جريدة المنظمة و الأنوار
كلشي مشى
ملي كلشي هز بونجة و داع في الدوار
الأخبار ولات فضايح
و البسالة ولات حوار
للاه للاه يا الكلمة التالفة
قولي لي فين مشيتي
و فين تليتي
خليني نتبعك ما بقا عندي مقام
القبيلة ولات خاوية ما فيها زحام
سوقها خاوي
ما بقات فيه رحبة للكلام
و لا وذنين تسمع ضرها
بعدما سلبتها الأفلام.