كانت صيحة
بعد فضيحة
كل واحد دار شغالو
بعرق الوالدين و مرار الغفلة
قبطوا طريق لخلا
قالوا وصلنا
كل واحد و كلامو
حاكموا لبلاد
نصبوا حكام
غطاو الزلة
ف لوهام عامو
هذا كلام
ما فيه دهون
يوصل للناس
يعرفوا سهامو
” المغرب لو شان
تاريخ دهب
واخا يعتر
ينوض بحلامو”
كاينة السوسة
الترياب و الفساد
الحاجة و المحتاجة
الجافل عندنا لجامو
الفدان يقدر يتحاز
خيرو بين تريكت الحواز
و الحق يتضرب بخنجر الغدر
المظلوم يقدر يزيح ظلامو
هي طريق عوجة
بحارها صياد
واخا عندك الدراع
بحار الذل يغرق عوامو
قطران بلادي ولا عسل البلدان
قالها جدي
مزينها قوالو
القلب سموم دخلاك
و العقل بتخمامو
زيد الغربة و النكران
و سم العديان مسطر مزيان
يقلي الزيت كدوب و بهتان
فالخوا يضرب وراه و قدامو
ديما فتان من قهرة الغير يبان
مزوق بالزور و غنان
مسكين مرعوب
يبيع للناس حرامو
هي ضربة غيرة
من ولد لبلاد قاسنا غيار
الوجه حطوه فالتراب
اللسان ما فيه عضم يضر بمرارو
العديان حاضرين
كتابة تصوار و كلام
الشوهة و الإشاعة عنوان
كلها بغاية وتسطير و ترسامو
قالو الهجمة ربحة ولا دبحة
السعد و يزيان الحال
كانت الصدمة غمة
رفيع الشان نزل مقامو
شحال من عشيور غدر الطعام
بعد الدخلة تنكر للتراب
نسى الراصا د باه ومو و لبيه قامو
آش بقى ما يتقال يا حضار
فبلادنا النصراني جار
تخلط الليل بالنهار
ولادنا يتكلمو بلسان الاستعمار
الخاين من الذل يرمي سلامو
ليك يا مسؤول سؤال
شكون المسؤول فبلاد خوار
الفوسفاط و جوج بحورا
و كنوز فجبال و صحاري مطمورة
و شباب ثروة يدو مبتورة
و حوال مواتية لتغيير الحال
عقول منورة و أرض مشكورة
الفساد قتال يا حضار
البلاد محتاجة للصفا
كلها يصفي عرامو
تقدر السوسة تدخل للغربال
عيون الغربال تصفي تغربالو
هكا لبلاد تقلع الفساد
بالمروة و الرجال
التغيير عندو مقامو
الزمان مكار
لفرط فدارو تقل مقدارو
هي قوال نظام وكلها و تنظامو